Месяца Іулія въ 4-й день (ст. ст.)
иже есть день убіенія Царской Семьи.
Служба святому благоверному страстотерпцу Царю Мученику Николаю II, святей благоверней Царице Мученице Александре, святому благоверному царевичу мученику Алексію, святымъ благовернымъ царевнамъ мученицамъ Ольге, Татіане, Маріи и Анастасіи, святей благоверней книгине преподобномученице Елисавете [1], святымъ благовернымъ мученикомъ царскаго рода, св. преп.-муч. инокине Варваре [2] и вернымъ царскимъ слугамъ съ ними убіеннымъ.
Вечеръ, Блаженъ мужъ: 1-й антифонъ.
На Господи воззвахъ, стихиры на 8, гласъ 6. Подобенъ: Всю отложивше.
Яже издревле святая Русь егда начатъ отступати отъ Создателя и Бога своего, *долготерпеливый Господь посла многія праведныя мужи и пророки, * отъ нихже последній бысть святый праведный пастырь Кронштадтскій Іоаннъ, * призывая грешныя къ покаянію, * и возвещая гневъ Господень на нераскаявшихся, * но не послуша сихъ народъ. * Тогда предаде Богъ прежде благочестивую землю русскую веліимъ гоненіемъ на веру, * яко да грешныя вразумитъ, * верныя же возвеличитъ и прославитъ * чрезъ терпеніе, страданія и смерть за Христа, * являя сонмъ святыхъ новомучениковъ, * отъ нихже великій бысть страстотерпецъ царь мученикъ Николай съ царицею и чады и слуги, * яже ныне молятся о душахъ нашихъ. (Дважды.)
Гласъ 2. Подобенъ: Егда отъ древа.
Егда ты, царю мучениче, отъ богоборцевъ заключенъ бывъ, * велію радость съ царицею и чады имелъ еси, * егда служитель Божій посещаше тя, * службу Божію совершая. * Такова благочестиваго царя и Помазанника Божія * множайшіи отъ народа отвратишася, * яко забыша слово Божіе, * призывающее почитати царя, * и пріиде на вся ны гневъ Божій. * Сего ради въ покаяніи зовемъ: * Господи, подаждь страждущей стране Россійстей, * предстательствомъ великаго страстотерпца царя мученика * отъ богоборныхъ избавленіе * и возставленіе престола православныхъ царей.
Воспеваемъ тя, царю мучениче, * и многострадальный страстотерпче, * понеже всехъ въ сердце своемъ вмещалъ еси, *якоже Павелъ апостолъ, * алчущаго насыщая, * скорбящаго утешая, и страждущему соскорбя, * о заблуждающихъ печалуя, *осужденнаго злодея милуя, * клевету и неправду кротко снося, * о вере и благочестіи ревнуя, * славу и богатство міра сего нивочтоже вменяя, * паче же отягощаяся ими, * попеченіе о мире всего міра имея, * любовію ко всемъ пламенея. * Пріими и насъ въ сердце твое, * о многострадальный царю и великій страстотерпче, * и моли милостиваго Бога, да помилуетъ насъ, * и подастъ намъ крепость подражатели твои быти.
Ины стихиры, гласъ 6. Подобенъ: Всю отложивше.
Боговенчанная мученице, святая царице Александро, * кто изречетъ твое воистину евангельское житіе? * Прешла еси отъ иноверія къ вере православней, * юже воспріяла еси всемъ сердцемъ твоимъ, * возлюбивши молитву, храмъ и святыя таинства, * еще же поученія святыхъ отецъ, * возрастивши чада твоя во благочестіи, * и уготовляющи ихъ къ мученію за Христа, * терпящи кротко клевету забывшихъ Бога, * и не разумевающихъ истиннаго благочестія твоего, * сего ради молимъ тя, * моли Христа Бога, Егоже возлюбила еси, * да спасетъ души наша.
Велія вера твоя, святая мученице царице Александро, * въ горцемъ заточеніи отъ богоборцевъ бывши, * и чающи мученическія смерти, * глаголала еси сице: * да уготовимъ себе къ сретенію небеснаго Жениха, * Богъ исполняетъ и озаряетъ душу мою неизглаголанною радостію и тишиною, * душа моя ликуетъ, * разумеющи, яко Женихъ приближается, * душа моя трепещетъ, яко Богъ близъ есть, * да просимъ у Господа себе и всему міру греховъ прощенія, * помолимся о забывающихъ молитися и о всехъ людехъ. * Исходатайствуй, святая мученице, и намъ греховъ прощеніе, * и велію милость.
Святый мученикъ царевичъ Алексій, * возлюби силу крестную. * Сія вера крестная поможе ему * безъ роптанія понести страдальческій крестъ неизцельнаго недуга * чрезъ всю его маловременную жизнь, * и съ терпеніемъ и упованіемъ пріяти мученическую кончину за Христа. * И ныне на небесехъ молися о насъ, * верою и любовію совершающихъ память твою, * да подастъ и намъ Господь, * веру и терпеніе и любовь.
Святіи мученицы Христовы, царевны Ольго, Татіано, Маріе и Анастасіе, * яви васъ Христосъ, яко ангелы во стране Россійстей, * бысте бо чистоты, любве и состраданія образъ, * имже научистеся отъ благочестивейшихъ родителей своихъ, *любовь велію имущи ко всемъ, наипаче ко страждущимъ, * имже послужисте, по заповеди Христовой: * боленъ и посетисте Мене, * егда же гоненіе, заточеніе и поношеніе наста, * добродетели величайшія веры, кротости, терпенія и всепрощенія показасте, * воспевающе святыя молитвы, * и полагающе надежду на Бога, * взывающе ко Господу предъ иконы многими, *ихже устроисте у себе, * моляся кротко за враговъ, * неповинно васъ терзающихъ и убивающихъ. * Кротость и терпеніе ваше сердца злодеевъ умягчаше. * Велія ваша добродетели на земли, * велія слава на небесехъ, * святыя невесты Христовы, *молитеся о душахъ нашихъ.
Слава, гласъ 8. Богоизбранная преподобномученице княгине Елисавето, * егда буря безбожія на землю русскую найде, *сія глаголала еси: * якоже въ бури естественней бываютъ: * нецыи бегутъ, иніи поражаются, * инемъ же очи душевніи открываются, * да видятъ величіе Божіе, * тако и въ вихре житейстемъ приключаются, * душа бо твоя въ потрясеніихъ узре десницу Божію: * лютое убіеніе твоего мужа [3] * приведе тя къ служенію Богу и ближнимъ: * немощнымъ, оставленнымъ и увечнымъ служила еси со смиреніемъ и любовію, * еще же воспріяла еси иноческое житіе, * и бежати отъ богоборцевъ не восхотела еси, * безъ страха пріимши мученическую смерть за Христа. * Мы же почитающе благоуханныя мощи твоя [4], *усердно просимъ: * моли о чтущихъ твоя подвиги и страданія.
И ныне, богородиченъ: Царь Небесный за человеколюбіе на земли явися, * и съ человеки поживе: * отъ Девы бо чистыя плоть пріемый, * и изъ нея прошедый съ воспріятіемъ: * Единъ есть Сынъ, сугубъ естествомъ, * но не vпостасію. * Темже совершенна Того Бога, * и совершенна Человека воистинну проповедающе, * исповедуемъ Христа Бога нашего: * Егоже моли, Мати безневестная, * помиловатися душамъ нашимъ.
Входъ. Прокименъ дне.
Премудрости Соломони чтеніе (Глава 3):
Праведныхъ души въ руце Божіей, и не прикоснется ихъ мука. Непщевани быша во очесехъ безумныхъ умрети, и вменися озлобленіе исходъ ихъ: и еже отъ насъ шествіе сокрушеніе, они же суть въ мире. Ибо предъ лицемъ человеческимъ, аще и муку пріимутъ, упованіе ихъ безсмертія исполнено, и вмале наказани бывше, великими благодетельствовани будутъ, яко Богъ искуси я, и обрете ихъ достойны себе. Яко злато въ горниле искуси ихъ, и яко всеплодіе жертвенное пріятъ я. И во время посещенія ихъ возсіяютъ, и яко искры по стеблію потекутъ. Судятъ языкомъ, и обладаютъ людьми, и воцарится Господь въ нихъ во веки. Надеющіися Нань уразумеютъ истину, и верніи въ любви пребудутъ Ему, яко благодать и милость въ преподобныхъ Его, и посещеніе во избранныхъ Его.
Царствъ третіихъ чтеніе (Глава 8):
Ста Соломонъ предъ лицемъ олтаря Господня, предъ всемъ соборомъ израилевымъ, и воздевъ руце свои на небо, и рече: Господи Боже Израилевъ, несть Богъ, якоже Ты на небеси горе, и на земли доле. Аще бо небо, и небо небесе не довлеютъ Тебе, како храмъ сей, егоже создахъ Имени Твоему; обаче и призриши на молитву мою, Господи Боже Израилевъ, услышати моленія и молитву, еюже рабъ Твой молится предъ Тобою къ Тебе днесь: Да будутъ Очи Твои отверсты на храмъ сей день и нощь, на место сіе, о немже глаголалъ еси: будетъ Имя Мое тамо, еже услышати молитву, еюже молится рабъ Твой на месте семъ, во дни и нощи: И послушати мольбы раба Твоего, и людей Твоихъ Израиля. И елика аше помолятся къ Тебе на месте семъ, и Ты услышиши на месте жилища Твоего на небеси: и сотвориши, и милостивъ будеши имъ.
Пророчества Исаіина чтеніе (Главы 61 и 62):
Да возрадуется душа моя о Господе, облече бо мя въ ризу спасенія, и одеждею веселія одея мя, яко жениху возложи мне венецъ, яко невесту украси мя красотою. И яко земля растящая цветъ свой, и яко вертоградъ семена своя прозябаетъ: тако возсіяетъ Господь правду, и радость предъ всеми языки. Сіона ради не умолкну, и Іерусалима ради не попущу, дондеже убо изыдетъ яко светъ правда моя, спасеніе же мое яко светило разжжется. И узрятъ языцы правду Твою, и вси царіе земстіи славу Твою, и нарекутся именемъ Твоимъ новымъ, еже Господь именуетъ e. И будеши венецъ доброты въ руце Господни, и діадима царствія въ руце Бога Твоего. И ктому не наречешися оставленъ, и земля твоя ктому не наречется пуста: тебе бо наречется воля моя, и земля твоя вселенная, яко благоволи Господь въ тебе, и земля твоя населится. И яко живяй юноша съ девою, тако поживутъ сынове твои съ тобою. И будетъ, имже образомъ возвеселится женихъ о невесте, тако возвеселится Господь о тебе.
На литіи стихира храма: и мученикомъ стихиры, гласъ 3:
Слава истинная страданіе есть, * тако бо рече Господь: * Ныне прославися Сынъ Человеческій, * славою Своею на кресте страданіе именуя. * Сея крестныя славы сподобишася царственніи мученицы, * иже подражаша страстемъ Спасовымъ, * сего ради возлюби ихъ Христосъ, * и возвеличи на небесехъ, * да молятся о душахъ нашихъ.
Слава: гласъ 8: Не суть совети Божіи, якоже совети человечестіи, * и не яко путіе человечестіи путіе Божія, глаголетъ Господь, * сего бо смиряетъ и сего возноситъ, * Господь мертвитъ и живитъ, * убoжитъ и богатитъ, * возставляетъ отъ земли убога, * престолъ славы дая ему. * Тако престолъ славы уготова Господь * возлюбленному Своему славному мученику царю Николаю, * воздая ему за благочестіе, * и по крестнемъ пути соделавъ его жива на небесехъ, * яко да молится за народъ свой, *да попеченіе воспріимемъ о царствіи небеснемъ, * и о спасеніи душъ нашихъ.
И ныне, богородиченъ: Безневестная Дево, * Яже Бога неизреченно заченши плотію, * Мати Бога Вышняго, * Твоихъ рабовъ мольбы пріими, Всенепорочная, * всемъ подающи очищеніе прегрешеній: * ныне наша моленія пріемлющи, * моли спастися всемъ намъ.
На стиховне стихиры, гласъ 8. Подобенъ: О преславнаго чудесе.
Не о славе царства земнаго попеченіе имелъ еси, * славный мучениче царю Николае, * егда венчаніе на царство и мvромъ помазаніе воспріялъ еси, * но помышлялъ еси о славе Божіей и о царстве небесномъ, * въ молитве предъ народомъ глаголя: *Владыко мой и Господи, * настави мя и вразуми въ великомъ служеніи семъ, * да будетъ со мною Твоя божественная премудрость, * посли ю съ небесъ святыхъ Твоихъ, * да разумею, чтo есть угодно предъ очима Твоима, * и чтo есть право по заповедемъ Твоимъ, * буди сердце мое Тобою управлено, * еже все устроити ко славе Твоей, * и къ пользе душевней врученныхъ мне людей. * Сія молитва угодна бысть предъ Богомъ, * и ныне, яко мученикъ, не престай молити Бога о пользе душевней твоихъ людей, * яко да милостивъ будетъ къ нимъ, * подая намъ оставленіе греховъ, * миръ и велію милость.
Стихъ: Вознесохъ избраннаго отъ людей Моихъ.
Яко агнецъ незлобивый, * веденъ бысть царь мученикъ Николай на убіеніе, * съ царицею, и чады, и верными слуги, * и имея душу чисту, * вверяя себе и присныхъ Богу, никогда же пороптавъ, * пріятъ же кротко смерть за Христа. * И ныне предстоя со ангелы и великимъ сонмомъ новомученикъ на небесехъ, * молитъ о спасеніи страны Россійскія отъ лютыхъ безбожникъ, * да обратятся къ Богу вси отступившія отъ Него, * да утвердится страхъ Божій въ сердцахъ, * и да возсіяетъ паки вера Христова.
Стихъ: Елеемъ святымъ Моимъ помазахъ его.
Сія исповедаху святіи царственніи мученицы * предъ неповинною смертію за Христа, * повторяюще святоотеческое завещаніе: * мученицы древніи, иже вероваху въ Господа Іисуса Христа, * на смерть идяху яко на праздникъ, * открыливше умъ и сердце верою, * осуждени же на смерть духъ миренъ имеяху, * иже ихъ не оставляше никогдаже, * мирно бо на смерть идяху, * внити во иную жизнь духовную уповающе, * яже отверзается за гробомъ. * Деломъ сія словеса испытавше, * ныне святіи царственніи мученицы радуются со Христомъ на небесехъ, * со дерзновеніемъ молящеся о душахъ нашихъ.
Слава, гласъ 6: Кто изречетъ труды твоя и страданія? * Страстотерпче великій и мучениче царю Николае, * тяжкое бремя власти воспріялъ еси, * не славы ради, * но яко христіанскій царь и слуга Христовъ, * пекійся о пользе народа, * множество скорбей претерпевъ. * Вся сія попусти Господь за грехи народа, * и да явитъ благочестіе твое, * показуя міру терпеніе твое, *яко многострадальнаго Іова, * да получиши славный мученическій венецъ на небесехъ, * Авелеву венцу подобный, * идеже ныне ликуя со ангелы, * предстательствуеши за ны предъ Богомъ, * моляся о спасеніи душъ нашихъ.
И ныне, богородиченъ: Творецъ и избавитель мой, Пречистая, * Христосъ Господь изъ твоихъ ложеснъ прошедъ, * въ мя оболкійся, * первыя клятвы Адама свободи. * Темже Ти, Всечистая, * яко Божіи Матери же и Деве воистинну, * вопіемъ немолчно: * радуйся ангельски, радуйся Владычице, * предстательство и покрове, * и спасеніе душъ нашихъ.
Аще бденіе совершается: тропарь дважды, Богородице Дево единожды.
Аще поліелей: Тропарь, гласъ 5:
Царства земнаго лишеніе, * узы и страданія многоразличныя, * кротко претерпелъ еси, * свидетельствовавъ о Христе даже до смерти отъ богоборцевъ, * страстотерпче великій Боговенчанный царю Николае, * сего ради мученическимъ венцемъ на небесехъ * венча тя съ царицею, и чады, и слуги твоими Христосъ Богъ, * Егоже моли * помиловати страну Россійскую, * и спасти души наша.
Слава, и ныне: богородиченъ: Радуйся двере Господня непроходимая, * радуйся стено, и покрове притекающихъ къ Тебе, * радуйся необуреваемое пристанище, и неискусобрачная, * рождшая плотію Творца Твоего и Бога, * молящи не оскудевай о воспевающихъ, * и кланяющихся Рождеству Твоему.
НА УТРЕНИ:
На Богъ Господь, тропарь святыхъ, дважды: Слава: тропарь св. преподобномученице княгине Елисавете, гласъ 4-й:
Кротость и смиреніе и любовь * вселивши въ душу свою, * усердно послужила еси страждущимъ, * страстотерпице святая княгине Елисавето, * таже съ верою претерпела еси страданія и смерть за Христа, * съ мученицею Варварою. * Съ нею же моли о всехъ съ любовію почитающихъ васъ.
И ныне: богородиченъ, гласъ 4-й: Еже отъ века утаенное, * и ангеломъ несведомое таинство: * тобою, Богородице, сущымъ на земли явися, * Богъ въ неслитномъ соединеніи воплощаемь, * и крестъ волею насъ ради воспріимъ, * имже воскресивъ первозданнаго, * спасe отъ смерти души наша.
По 1-й кафизме седаленъ, гласъ 7:
Трижды отвергся Петръ, * но принесе слезы покаянія, * и абіе помилованъ бысть * и возведенъ въ чинъ первоверховнаго апостола. * Царь же и великій страстотерпецъ Николай аще и отречеся отъ престола, * видя окрестъ себе измену и боязнь и обманъ, * и разумея, яко вси ближніи военачальницы и народъ отрекошася отъ него, * онъ же не отречеся отъ Христа, * ни отъ любве къ народу своему, * и не восхоте бежати отъ богоборцевъ, * но кротко вся претерпевъ, * пріятъ неповинно мученическую смерть за Христа, * якоже сродницы его благоверніи князи Борисъ и Глебъ. * Сего ради молимъ тя, страстотерпче царю, *молися Христу Богу, * прегрешеній оставленіе даровати * празднующимъ любовію святую память твою.
Слава, и ныне: богородиченъ: Молитву пріемши отъ насъ, * въ кровъ Твой, Пречистая Дево, прибегающихъ, * не престай молящи Человеколюбца * спастися рабомъ Твоимъ.
По 2-й кафизме, седаленъ, гласъ 7:
Съ любовію веліею къ неблагодарнымъ людемъ, * принеслъ еси себе, великій страстотерпче царю, въ жертву за народъ твой, * якоже реклъ еси: * аще потребна есть жертва за народъ, азъ жертва сія буду. * Бoльши сея любве никтоже имать, * аще кто душу свою положитъ за други своя. * Ныне же предстоя Христу, Емуже послужилъ еси, * моли о насъ, чтущихъ любовію память твою.
Слава, и ныне: богородиченъ: Ужасно чудо зачатія и несказаненъ образъ рождества * въ тебе Познася, Приснодево Чистая, * ужасаетъ мой умъ и удивляетъ помышленіе. * Слава Твоя, Богородице, всемъ бысть радость, * во спасеніе душъ нашихъ.
Поліелей и величаніе:
Величаемъ васъ, * страстотерпцы святіи царственніи мученицы, * и чтимъ честная страданія ваша, * яже за Христа *претерпели есте.
Стихъ: Богъ намъ прибежище и сила, Помощникъ въ скорбехъ обретшихъ ны зело.
Стихъ: Вменихомся, яко овцы заколенія.
Стихъ: Проидохомъ сквозе огнь и воду и извелъ еси ны въ покой.
По поліелеи, седаленъ, гласъ 7:
Егда ты, царю мучениче Николае, царскій престолъ воспріялъ еси, * не просилъ еси у Бога богатства именій, ни славы, *ниже душъ противящихся тебе, * ниже дній многихъ, * но отъ сердца просилъ еси, якоже премудрый Соломонъ, глаголя: *даждь ми, Господи Боже, премудрость и разумъ. * Сего ради услыша тя Господь, * и даде тебе по прошенію твоему, * являя тя ревнителя о благочестіи, * мудраго и смиреннаго царя, * и венча тя за благочестіе славнымъ венцемъ небеснымъ, * да мoлишися о православныхъ людехъ, * предстоя со ангелы святыми на небесехъ * у престола Божія.
Слава, и ныне, богородиченъ: Пречистая Дево, помилуй насъ, * прибегающихъ верою къ Тебе милосердней, * и просящихъ теплаго Твоего заступленія. * Яко мати Бога вышняго, * моли Сына Твоего, Христа Бога нашего, * спастися рабомъ твоимъ.
Степенна, 1-й антифонъ 4-го гласа.
Прокименъ, гласъ 4: Тебе ради, Господи, * умерщвляеми есмы весь день.
Стихъ: Вменихомся яко овцы заколенія.
Всякое дыханіе: Евангеліе отъ Матфея, зач. 36.
Псаломъ 50-й: — Слава: Молитвами царственныхъ мучениковъ: — И ныне: Молитвами Богородицы: — Помилуй мя, Боже:
Стихира, гласъ 6-й:
Велію веру и дивное терпеніе, * и любовь ко врагомъ стяжалъ еси, * святый мучениче царю Николае, * во испытаніихъ на Бога надеяся, * во страданіихъ долготерпя, * враговъ и убивающихъ тя прощая, * и прося не мстити за себе, * понеже реклъ еси, яко зло не победитъ зла, но токмо любовь, * и кончину мученическую за Христа кротко пріемля. * Темже возвеличи тя Христосъ на небесехъ, * Егоже моли о верою и любовію чтущихъ тя.
Канонъ молебный Богородице, со ирмосомъ на 6 и святому на 8.
Канонъ, плачъ царя мученика, егоже краестрочіе: Пощади, Боже, люди согрешившія. Гласъ 2 [5].
Песнь 1. Ирмосъ:
Грядите людіе, * поимъ песнь Христу Богу, * раздельшему море и наставльшему люди, * яже изведе изъ работы египетскія, * яко прославися.
Припевъ: Святіи царственніи мученицы, молите Бога о насъ.
Поруганіе зря и разореніе земли своея отъ безбожныхъ врагъ, плакася изъ глубины сердца благочестивый царь, якоже пророкъ Іеремія и тріе отроцы, моляся за люди согрешившія и горько стеняше: милостиве Господи, не остави насъ.
О како земля русская, прежде славная въ міре и благоденствующая, пленена бысть отъ богоборцевъ; вси дружащіися съ нею отвергошася ея, быша ей врази. Отринулъ есть Господь царя и князя и священника. Виждь, Господи, призри и помилуй.
Щедроты Господни бездна многа, не во векъ отринетъ Господь, но помилуетъ смирившихся и кающихся по множеству милости Своея и избавитъ люди Своя, якоже древле Израиля отъ рабства египетскаго.
Богородиченъ: Съ верою и любовію притекающихъ къ Тебе и со страхомъ поющихъ Тя, молитвенный гласъ услыши, Владычице.
Катавасія: Отверзу уста: гласъ 4-й.
Песнь 3. Ирмосъ:
На камени мя веры утвердивъ, * разширилъ еси уста моя на враги моя, * возвеселибося духъ мой, внегда пети: * несть святъ, якоже Богъ нашъ, * и несть праведенъ паче Тебе, Господи.
Ангелъ Хранитель попущеніемъ Божіимъ отъятъ бысть отъ земли Россійскія, врази ея сташа во главе, ненавидящіи ю благоденствуютъ за множество нечестія прежде благочестивыя земли, князи ея пребываютъ въ народехъ чуждихъ. Не отрини, Господи, страждущихъ людей Твоихъ до конца, но обрати и утверди ихъ на камени заповедей Твоихъ.
Доколе, Господи, путь нечестивыхъ спеется, доколе плакати имать земля отъ злобы живущихъ на ней (Іер. 12, 1. 4) Архіереи, священницы, князи и верніи людіе низложени и убіени быша. Доколе, Господи, Владыко Святый и истинный, не судиши врагомъ Твоимъ за кровь ихъ? (Апок. 6, 10) Помилуй и избави всехъ насъ отъ враговъ Твоихъ и спаси души наша.
Избавленія не имущи, скорби и стенанія исполнися земля прежде христоименитая, во страданіи своемъ глаголя: согрешихомъ и беззаконновахомъ отступивше отъ Тебе, Господи, и заповедей Твоихъ не послушахомъ, ниже соблюдохомъ. Обрати насъ, Боже, къ покаянію и утверди на недвижимемъ камени заповедей Твоихъ.
Богородиченъ: Упованіе и надежда наша ты еси, Пресвятая Владычице, спаси страждущее отечество наше, и люди Твоя молящіяся и имя Твое призывающія.
Катавасія: Твоя песнословцы, Богородице, * живый и изобильный источниче, * ликъ себе совокупльшія духовно утверди, *въ Божественней Твоей славе, * венцевъ славы сподоби.
Кондакъ св. мученице княгине Елисавете. Гласъ 4:
Отъ славы царственныя, * вземши крестъ Христовъ, * прешла еси къ славе небесней, молящися за враговъ, * и обрела еси радость вечную, * святая мученице княгине Елисавето, * съ Варварою мученицею, * темже молите о душахъ нашихъ.
Седаленъ, гласъ 7:
Страстотерпице святая княгине Елисавето, * егда тя живу во Алапаевскую шахту ввергоша, * купно со святыми мученики царскія крове, * яже беху князіе Сергій [6], Іоаннъ [7], Константинъ [8], Игорь [9] и Владиміръ [10], * такожде мученица Варвара [11], * и святый мученикъ Феодоръ [12], * изнемогающимъ же надолзе всемъ отъ ранъ, * облегчала еси еле жива сущи страданія умирающихъ, * воспевающи священныя песнопенія, яже слышаху мимоходящіи. * Сего ради молимъ тя, молися Христу Богу * прегрешеній оставленіе даровати * празднующимъ любовію святую память твою.
Слава, и ныне, богородиченъ: Егда предстану предъ лицемъ Создателя моего * въ день праведнаго суда Его, * тогда, Владычице, предстани ми, * и вечныя муки избави мя, * да не сниду во адъ, но да спасуся * Твоимъ, Пресвятая Богородице, заступленіемъ.
Песнь 4. Ирмосъ:
Пришелъ еси отъ Девы, не ходатай, ни ангелъ, * но Самъ, Господи, воплощся, * и спаслъ еси всего мя человека. * Темъ зову Ти: слава силе Твоей, Господи.
Беззаконія людей Твоихъ велики быша предъ очима Твоима, Господи, сего ради безбожніи врази святилища Твоя оскверниша и разориша, якоже пророкъ Исаія рече: праздниковъ вашихъ ненавидитъ душа Моя, не стерплю греховъ вашихъ, егда прострете руки ваша ко Мне, отвращу очи Мои отъ васъ (Ис. 1, 14-15). Приближаются бо Мне людіе сіи усты своими, сердце же ихъ далече отстоитъ отъ Мене (Ис. 29, 13). Разумеюще сіе, ныне каемся и обращаемся къ Тебе, да престанетъ гневъ Твой, да побориши борющіи ны и да речемъ: слава силе Твоей, Господи.
О како бремя беззаконій народа Твоего, Господи, умножися, Ты отъялъ еси силу нашу, предалъ еси насъ въ руки беззаконниковъ и соделашася вси раби. Токмо Ты, едине Господи, можеши, аще хощеши свободити ны, егда познаемъ грехи своя и обратимся къ Тебе Создателю нашему и прославимъ Тя.
Жизнь во веки блаженная токмо въ Бозе есть, но узокъ путь вводяй въ животъ. Сія забы народъ Твой, Господи, и не послуша словесе Твоего, Христе Царю, но широкимъ путемъ греха пойде. Пріиде же на ны насиліе и пагуба, изгнаніе и смерть, да уразумеемъ единый истинный путь Твой, Спасителю нашъ, и обратимся и прославимъ Тя.
Богородиченъ: Ты еси, Пречистая Богородице, прибежище наше и утвержденіе. Моли Сына Твоего и Бога нашего подати намъ спасеніе и греховъ оставленіе.
Песнь 5. Ирмосъ:
Света подателю * и вековъ Творче, Господи, * во свете Твоихъ повеленій настави насъ, * разве бо Тебе иного Бога не знаемъ.
Егда отринулъ есть Господь царя и князя и священника, храмы же и жертвенники и святилища Своя не пощаде, тогда возскорбехъ, сердце мое смятеся во мне, воздыхаю и несть утешающаго. Призри, Господи, и пощади, просвети ны повеленіи Твоими, да обратимся къ Тебе и послужимъ Ти.
Людіе Твои, Господи, бежати вожделеша отъ насилія враговъ и не возмогоша, иніи же въ народехъ чуждихъ скитаются. Сіе бысть, яко ложніи вожди вещаша суету и безуміе и не глаголаху о гресехъ, да отвратятъ гневъ Божій, плененіе и изгнаніе. Ныне отверзоша на ны уста своя вси врази наша, поскрежеташа зубы своими и реша: поглотимъ ихъ. Возстани, воззови въ нощи, изливай молитву ко Господу, простирая къ Нему руце и глаголя: виждь, Господи, погибель нашу, просвети, призри и помилуй.
Юноши и девы, старцы и младенцы неповинніи убіени быша, погна врагъ душу мою, смирилъ есть въ землю животъ мой, посадилъ мя есть въ темныхъ, яко мертвыя отъ века, и уны во мне духъ мой, во мне смятеся сердце мое, погибе сила моя и надежда моя на Господа. Помяни, Господи, нищету мою и горесть. Сія глаголахъ въ сердце моемъ, сего ради потерплю страданіе отъ Бога, яко да призритъ Господь на смиреніе мое.
Богородиченъ: Бога, Егоже родила еси, Пречистая Маріе, моли рабомъ Твоимъ подати прегрешеній оставленіе.
Песнь 6. Ирмосъ:
Во глубине греховней содержимъ есмь, Спасе, * и въ пучине житейстей обуреваемь, * но якоже Іону отъ зверя, * и мене отъ страстей возведи, и спаси мя.
Даде Господь утешеніе, яко милость Господня не остави насъ, и не скончашася щедроты Его, обновляются бо на всякъ день. Сего ради будемъ надеющеся на Бога, Господь часть наша есть, пребудемъ уповающе на Него, могущаго избавити насъ отъ всехъ бедъ, якоже Іону отъ зверя морскаго.
Ищущимъ Бога благо есть, благъ бо Господь надеющимся на Него, благо душе въ терпеніи ожидающей спасенія Божія, дающей лице свое біющему и пріемлющей поношеніе, яко не на веки отринетъ Господь, но избавитъ отъ погибели души смирившихся и уповающихъ на Него.
Согрешившимъ людемъ посла Господь гoре, но помилуетъ по велицей благости и любви въ попеченіи Своемъ, порази бо и огорчи сыны человеческія не отъ изволенія сердца Своего, но егда попраша заповеди Его, яко отъ Вышняго исходитъ наказаніе и благоденствіе. Да не возропщетъ о наказаніи всякъ живущій, да сетуетъ же о гресехъ своихъ и восплачетъ, дондеже приклонится и увидитъ Господь съ небесе.
Богородиченъ: Ныне къ Тебе прибегаю, Пречистая, спаси мя молитвами Твоими и соблюди: елика бо хощеши, можеши, яко Мати Всемогущаго.
Катавасія: Божественное сіе и всечестное, * совершающе празднество, * богомудріи, Богоматере, * пріидите руками восплещимъ, * отъ Нея рождшагося Бога славимъ.
Кондакъ, гласъ 6:
Надежда царя мученика съ царицею и чады и слуги укрепи, * и къ Твоей любви окрыли, * будущій имъ покой предвозвестивши, * техъ молитвами, Господи, помилуй насъ.
Икосъ: Зря веру Христову благочестивымъ царемъ во стране Россійстей укрепляему, и не терпя сего, врази Божіи погубити христолюбиваго царя мученика Николая умыслиша, и предаша его неповинней смерти со благочестивою царицею и чады и слуги и со всемъ царственнымъ родомъ, но прельстишася, яко путь нечестивыхъ погибнетъ, праведницы же во веки живи будутъ, и вместо пагубы и вреда, сотвориша ихъ славныя мученики и заступники предъ Богомъ. Кровію ихъ и новомученикъ всехъ страна Россійская, богоборцы угнетаемая, спасена будетъ, понеже кровь сія семя новой жизни во Христе есть, техъ молитвами, Господи, помилуй насъ.
Песнь 7. Ирмосъ:
Образу златому на поле Деире служиму, * тріе Твои отроцы небрегоша безбожнаго веленія, * посреде же огня ввержени, орошаеми пояху: * благословенъ еси Боже отецъ нашихъ.
Обрати ны, Господи, къ Тебе, и обратимся, обнови дни наша служеніемъ Тебе, якоже прежде, яко благословенъ еси, и хвально и прославлено имя Твое во веки. Яко праведенъ еси во всемъ, яже сотворилъ еси намъ, и вся дела Твоя истинна, и прави путіе Твои, и вси суди Твои истинни. Сего ради душею сокрушенною и духомъ смиреннымъ глаголемъ: благословенъ еси Боже, препетый и превозносимый во веки.
Господи Боже, благословенъ еси, яко истиннымъ судомъ навелъ еси сія вся страданія на ны, грехъ ради нашихъ. Яко согрешихомъ и беззаконновахомъ и не соблюдохомъ и не сохранихомъ, якоже заповедалъ еси намъ, да благо намъ будетъ и да прославимъ имя славы Твоея святое, препетое и превозносимое во веки.
Решителю всехъ долговъ греховныхъ, Господи, благодать подаждь прощенія прегрешившей стране Россійстей, юже наказалъ еси ранами горькими. Обаче не во гневе Твоемъ, но по множеству щедротъ Твоихъ и неизреченней милости Твоей очисти землю православную отъ безбожныхъ враговъ, возстави, Щедрый, царя Помазанника Твоего и услыши ны, миръ церкви и спасеніе людемъ Твоимъ даруй, молитъ Тя царь страстотерпецъ и весь безчисленный сонмъ новыхъ мученикъ, Единаго благословеннаго Бога отецъ нашихъ.
Богородиченъ: Богородице Дево, рождшая Слово паче слова, Зиждителя Твоего, Того моли съ царемъ великомученикомъ, царицею и чады и слуги и прочими царственными мученики и всеми новомученики Россійскими, помиловати души наша.
Песнь 8. Ирмосъ:
Въ пещь огненную ко отрокомъ еврейскимъ снизшедшаго, * и пламень въ росу преложшаго Бога, * пойте дела яко Господа, * и превозносите во вся веки.
Шуяго стоянія избави насъ, Господи, вся къ пользе нашей строяй, пославый огненное очищеніе стране нашей, да непрестанно взываемъ: благословите вся дела Господня Господа.
Имамы сокровище веліе веру святую, юже Христосъ намъ недостойнымъ даде, да сохранимъ ю во благоденствіи и во страданіихъ, якоже сонмъ великій новыхъ страстотерпецъ даже до смерти веру сохрани, и да глаголемъ съ ними: Господа пойте дела и превозносите во веки.
Возжелавъ всеблагій Богъ явити крепость веры и силу терпенія царственныхъ мученикъ, даде имъ испити чашу горькихъ страданій и пріяти мученическую смерть, они же не поропташа, но яко агнцы незлобивіи не отверзоша устъ своихъ, съ терпеніемъ же и радостію вся претерпеша, взывающе: Господа пойте и превозносите во веки.
Богородиченъ: Спасенія ходатаица намъ явилася еси, Богородице, рождшая Спаса и Владыку всехъ, темже молимъ Тя: избавленіе отъ безбожникъ исходатайствуй люте страждущей стране Россійстей, и спасенія сподоби всехъ песнословящихъ Тя верно во вся веки.
Хвалимъ, благословимъ, покланяемся Господеви, поюще и превозносяще во вся веки.
Катавасія: Отроки блзгочестивыя въ пещи, * рождество Богородичо спасло есть, * тогда убо образуемое, * ныне же действуемое, * вселенную всю воздвизаетъ пети Тебе: * Господа пойте дела, * и превозносите Его во вся веки.
Песнь 9. Ирмосъ:
Отъ Бога Бога Слова неизреченною мудростію пришедшаго обновити Адама, * ядію въ тленіе падшаго люте, * отъ Святыя Девы неизреченно воплотившагося насъ ради, * верніи единомудренно песньми величаемъ.
Широкій путь греха, вводяй въ погибель, и мнози суть входящіи имъ, (Матф. 7, 13) рече Господь. Не послушаша сего евангельскаго гласа людіе Россійстіи, и гневъ Божій постиже ихъ, отъ негоже избави насъ, Христе, молитъ Тя святый великомученикъ царь Николай и иже съ нимъ убіенныя, и яко Человеколюбецъ помилуй и спаси души наша.
Іисусе Христе Боже нашъ, обрати ны по множеству милости Твоея и спасемся, призри съ небесе милостію и любовію, и виждь, яко предалъ еси насъ въ руки беззаконныхъ и есмы смирени по всей земли грехъ ради нашихъ. И ныне возследуемъ всемъ сердцемъ, и боимся Тебе, и ищемъ лица Твоего. Не посрами насъ, молитвами святыхъ царственныхъ страстотерпцевъ, но спаси души наша.
Яви, Господи, силу Твою, молитъ Тя царь страстотерпецъ, изми насъ отъ безбожныхъ врагъ нашихъ по чудесемъ Твоимъ, и сотвори съ нами по кротости Твоей и по множеству мнлости Твоея, и да посрaмятся вси являющіи рабомъ Твоимъ злая, и крепость ихъ да сокрушится и да разумеютъ, яко Ты еси Господь Богъ единъ по всей вселенней, славенъ и спасаяй души наша.
Богородиченъ: Ты еси крепость наша, Ты еси похвала и радованіе, хранительница наша, заступленіе, прибежище, предстательница непобедимая и покровъ страны Россійскія. Пречистая Богородице, съ царемъ мученикомъ и великимъ сонмомъ новомученикъ моли спасти рабы Твоя.
Катавасія: Всякъ земнородный, * да взыграетъ Духомъ просвещаемь, * да торжествуетъ же безплотныхъ умовъ естество, *почитающее священное торжество Богоматере, * и да вопіетъ: * радуйся, всеблаженная, Богородице * чистая Приснодево.
Светиленъ, гласъ 2:
Страдавшіи Тебе ради царственніи мученицы, Христе, * многія муки претерпеша, * и славныя венцы пріяша на небесехъ, * да мoлятся о душахъ нашихъ.
Слава, и ныне, богородиченъ: По Бозе упованіе имуще на Тя, * Пречистая Богородице, * молимъ Ти ся: рождшагося изъ Тебе умоли * даровати миръ вселенней и велію милость.
На хвалитехъ стихиры, гласъ 3:
Агнцы чистыя приведостеся ко Владыце, * страстотерпцы царственніи мученицы, * Того молите спасти души наша.(Дважды).
Раны ваша и язвы, * славніи царственніи мученицы, * язвы греховныя исцеляютъ всехъ верныхъ, * святіи страдальцы Господни, * многому терпенію научающе.
Лютыми ранами и страданьми мучими, * святіи царственніи страстотерпцы, * не отвергостеся истинныя Жизни Господа нашего, * ни богоборцевъ устрашистеся, * темже молитвами вашими * всехъ насъ утвердите.
Слава, гласъ 6: Молитвами, Христе, святыхъ мученикъ Твоихъ, * убіенныхъ за веру въ Тя, * Великихъ князей Михаила [13], Павла [14], Димитрія [15] и Георгія [16], * и верныхъ царскихъ слугъ: Иліи [17], Василія [18] и Евгенія [19], * Анастасіи [20], Екатерины [21] и Анны [22], * Алексія [23], Іоанна [24], Климента [25], Іоанна [26] и Николая [27], * помилуй и спаси души наша, * яко Благъ и Человеколюбецъ.
И ныне, богородиченъ, гласъ тойже: Богородице, Ты еси лоза истинная, * возрастившая намъ плодъ живота, * Тебе молимся, молися Владычице со святыми царственными страстотерпцы и всеми новомученики, * помиловати души наша.
Славословіе великое. По трисвятомъ, тропарь святыхъ, ектеніи и отпустъ.
НА ЛИТУРГІИ.
Блаженна песнь 3-я и 6-я на 8.
Прокименъ, гл. 4: Тебе ради, Господи, * умерщвляеми есмы весь день.
Стихъ: Вменихомся яко овцы заколенія.
Апостолъ къ Римляномъ, зачало 99.
Аллилуіа, гласъ 1. Стихъ: Богъ намъ прибежище и сила, Помощникъ въ скорбехъ обретшихъ ны зело.
Стихъ: Господи, спаси царя и услыши ны, въ оньже аще день призовемъ Тя.
Евангеліе отъ Іоанна, зачало 52.
Причастенъ: Радуйтеся праведніи о Господе, правымъ подобаетъ похвала.
Покаянная молитва, читаемая въ день убіенія Царской Семьи 4/17 іюля на литургіи.
Благословенъ еси, Господи Боже отецъ нашихъ, и хвально и прославлено имя Твое во веки...
Молитва святому царю мученику Николаю.
Святый страстотерпче царю мучениче Николае, Помазанника Своего тя Господь избра, во еже милостивно и право судити людемъ твоимъ и хранителемъ царства православнаго быти.
Царское служеніе сіе и о душахъ попеченіе со страхомъ Божіимъ совершалъ еси. Испытуя же тя, яко злато въ горниле, скорби горькія Господь ти попусти, якоже Іову многострадальному, последи же престола царскаго лишеніе и мученическую смерть посла ти. Вся сія кротко претерпевый, яко истинный рабъ Христовъ. наслаждаешися ныне вышнія славы у престола всехъ Царя, купно со святыми мученики: святою царицею Александрою, святымъ отрокомъ царевичемъ Алексіемъ, святыми царевнами Ольгою, Татіаною, Маріею и Анастасіею и съ верными слуги твоими, таже со святою мученицею княгинею Елисаветою и со всеми царственными мученики и святою мученицею Варварою.
Но яко имея дерзновеніе веліе у Христа Царя, Егоже ради вси пострадаша, моли съ ними, да отпуститъ Господь грехъ народа, не возбранившаго убіеніе твое, Царя и Помазанника Божія, да избавитъ Господь страждущую страну Россійскую отъ лютыхъ безбожникъ, за грехи наша и отступленіе отъ Бога попущенныхъ, и возставитъ престолъ православныхъ царей, намъ же подастъ греховъ прощеніе, и на всякую добродетель наставитъ насъ, да стяжимъ смиреніе, кротость и любовь, яже сіи мученицы явиша, да сподобимся небеснаго царствія, идеже купно съ тобою и всеми святыми новомученики и исповедники Россійскими прославимъ Отца и Сына и Святаго Духа, ныне и присно и во веки вековъ. Аминь.
ПОРЯДОКЪ ПОМИНОВЕНІЯ НОВОМУЧЕНИКОВЪ.
На Спаси Боже... после святыхъ Бориса, Глеба и Игоря:
Святыхъ благоверныхъ великихъ страстотерпцевъ Царя Мученика Николая, Царицы Мученицы Александры, св. мученика Царевича Алексія, св. мученицъ Царевенъ Ольги, Татіаны, Маріи и Анастасіи, св. преподобномученицъ Княгини Елисаветы и инокини Варвары и всехъ Новомучениковъ Россійскихъ.
После русскихъ святителей:
Иже во святыхъ отецъ нашихъ: Тихона, Патріарха Московскаго исповедника, СВЯЩЕННОМУЧЕНИКОВЪ: МИТРОПОЛИТОВЪ Владиміра Кіевскаго, Веніамина Петроградскаго, Петра Крутицкаго, Кирилла Казанскаго, Іосифа Петроградскаго, Агафангела Ярославскаго, АРХІЕПИСКОПОВЪ: Андроника Пермскаго и Гермогена Тобольскаго, ПРЕСВИТЕРОВЪ: Іоанна [28] и Іоанна [29] и всехъ Священномучениковъ Россійскихъ.
На отпусте въ День памяти царственныхъ мучениковъ 4/17 іюля, а где ихъ храмъ — ежедневно:
Святыхъ благоверныхъ великихъ страстотерпцевъ Царя мученика Николая, Царицы Мученицы Александры, св. мученика Царевича Алексія, св. мученицъ Царевенъ Ольги, Татіаны, Маріи и Анастасіи, св. преподобномученицъ Княгини Елисаветы и инокини Варвары и всехъ Новомучениковъ и Исповедниковъ Россійскихъ...
На молебне припевы:
1) Святіи царственніи мученицы, молите Бога о насъ.
2) Святіи новомученицы и исповедницы Россійстіи, молите Бога о насъ.
Богу нашему слава.
Примечанія:
[1] Великая Княгиня Елисавета Феодоровна, въ постриге Настоятельница Марфо-Маріинской Обители въ Москве, старшая сестра Царицы Мученицы Александры Феодоровны.
[2] Послушница Великой Княгини Елисаветы Феодоровны.
[3] Великій Князь Сергій Александровичъ, убитый террористами въ Москве въ 1905 г.
[4] Благоухающія мощи св. преп.-мучч. Княгини Елисаветы и инокини Варвары почиваютъ въ Гефсиманскомъ храме св. Маріи Магдаланы въ Іерусалиме. Два гроба съ этими мощами были доставлены туда изъ Китая въ 1921 году.
[5] Канонъ сей составленъ по образцу «Плача пророка Іереміи», стенавшаго о разрушеніи Іерусалима и Вавилонскомъ плененіи Израильскаго народа.
[6] Вел. Князь Сергій Михайловичъ, трое сыновей Вел. Князя Константина Константиновича:
[7] князь Іоаннъ Константиновичъ,
[8] князъ Константинъ Константиновичъ,
[9] князь Игорь Константиновичъ,
[10] князь Владиміръ Павловичъ Палей, сынъ Вел. Кн. Павла Александровича отъ морганатическаго брака,
[11] сестра Марфо-Маріинской Обители Варвара Яковлева и
[12] служащій Вел. Кн. Сергія Михайловича Феодоръ Михайловичъ Ремезъ.
[13] Братъ Царя-мученика Вел. Князь Михаилъ Александровичъ.
[14] Вел. Князь Павелъ Александровичъ.
[15] Вел. Князь Димитрій Константиновичъ.
[16] Вел. Князь Георгій Михайловичъ.
[17] Генералъ-Адъютантъ Илья Леонидовичъ Татищевъ.
[18] Гофмаршалъ князь Василій Александровичъ Долгоруковъ.
[19] Лейбъ-медикъ Евгеній Сергеевичъ Боткинъ.
[20] Фрейлина графиня Анастасія Васильевна Гендрикова.
[21] Гофъ-лектрисса Екатерина Адольфовна Шнейдеръ.
[22] Комнатная девушка Анна Степановна Демидова.
[23] Лакей Алексей Егоровичъ Труппъ.
[24] Поваръ Иванъ Михайловичъ Харитоновъ.
[25] Дядька Наследника Цесаревича Климентій Григорьевичъ Нагорный.
[26] Лакей Вел. Княженъ Иванъ Димитріевичъ Седневъ.
[27] Секретарь Вел. Князя Михаила Александровича Николай Николаевичъ Джонсонъ.
[28] Св. первомученикъ протоіерей Іоаннъ Кочуровъ.
[29] Св. священномученикъ протоіерей Іоаннъ Восторговъ.
Источникъ: Служба святымъ царственнымъ мученикамъ. — Montreal: Monastery Press, 1982. — 30 с
|
